Ca’ canny, mockit skies reveal intention
Shoogly coxcomb twirls an’ cross-eyes altered wyes
Bide fae the toon tho’ gallus bawface greets it’s awright
Huv gumption! Sleekit scunner’s tellin’ lies
Fair wabbit fae the info; heid’s a-burlin’!
But ah’ll dingy aw the footerers in thon hoose
Huvnae goat a scooby wit they’re daein’
It’s sidey wyes tae let us aw gang loose
Backhauners mid the roasters maks it awright
Lang spoons ur needed if ye sup wi’ thon
Mind yer feetie fae the coo pats as they’re drappin
It’s bowfin’ fae the stench o’ Eton’s sons
Ah’ll hae advice fae wans wh’urnae playin’ shove ha’peny
Wh’urnae lookin’ ower their shooders tae the croon
An’ when they cry, come oot, it’s clear, it’s awright
Will be time enough tae lay the fences doon
Fur it’s trust, ye see, ah cannae gie tae thon yins
Nae faith, ye ken, fur hist’ry’s made it so
When a coo calves a cuddy, ah’ll reconsider
Then ah’ll fire aff damp squibs tae let ye know
scottishmomus 